Daudu mai daud mein, Kushtiyaan bhi ladu, apne ko samjhaau aur apne se pyaar agar mai karu, dukh aur sukh banein mere saathi, sukh ki khoj na rahe baaki , behti chalu mai hawa ki tarah, pani mein ghul mai jaau, koi na bata paye ki wo bhi thi , aau aur jaau ek mausam ki tarah.
…aur doosri taraf, ek aisi asantushti ki daud mein daudte rehna
Jiski na tho koi Manzil na he theherne ka thikaana
Iss bhaag mein bhaag lene Wale sab muquabil
Daud mein rahein shamil , bus yahi sabki Manzil
Akele khade humein nahi rehna , usmein Sharam hai, Parda hai
Chaahe hum sahi raaste pe he Nikle kyon na ho
Akela rehna jurm hai
Bheed mein mitti ban ke raho
Magar mai mitti ki tarah paani mein behna chahti hoon
Na ruku, na thamu,
Bus behna, udna, milna, uthna chahun.
Mujhe jagah chahiye
Dharti ki satah pe pair
Aur aas paas ki hawa mein pankh failane ke liye
Jagah chahiye
Bheed mein mai laapata
Khoya hua
Apne aap ko khudse door mehsoos karta hoon
Door se apne aap ko dekhta hoon
Tho samajh nahi aata ki in sab mein mai kaun hoon
Mera astitva kya hai
Kahan hoon mai
Sawaal he sawaal
Mitti he mitti
Dhool ka bawandar
Logo ka samandar
Doob raha hoon mai
Mujhe tairne do
Bus apne aas paas thodi si jagah Chahiye
Satah par, lehron mein,
Thoda apne liye waqt
Takaaza hai ye mera
Illtija hai meri
Apni shaqsiyat se waquif hote he
Mai apne aap ko hum sab mein
Aise mila loonga
Jaise chai mein cheeni ki mithaas
Jaise hawa mein khushbu gulo ki
Raat andheri syah zulfon si
Nayano mein, gehri neend mein sundar khwaab
All things interesting ... 