Ye kavita likhi gayi thi ek subah sofe pe baith ke, jab baahar ek bade ped se tez surya ki kirne chhalni ho kar mujhe nehla rahi theen, saath he mai thodi si apne pati ke office jaane ki viraha mein nahaayi hui thi. Ek taraf hai sampoornta ka ehsaas aur hai ussmein mila-jula virah se upja aabhaas. Har pankti mein surya ki tapan aur virah ki tadap dono he inseparably ghuli-mili hain. Chaliye padhte hain iss kriti ko, naam hai Taapas.
Khuli khuli si dhoop
Sunehra chamakta suraj
Usski law
Usska sindoor
Pedho mein chhupta chhupaata
Fir bhi chamakta leh lahata
Usska soundarya
Usska tej
Usski dhadhak
Usski Garmi
Usske pyar ki garmi
Usski jhijhak
Usska apnapan
Har baat mein vinamra
Har baat mein sulag
Sab kuchh alag
Jahan vo nahi
Vaha andhera sa
Shaam si
Ek thandak si
Aahon mein
Usski bahon mein
narmi se
Ek garmi si
Thami si
Ek rukaav sa
Ek thehraav sa
Usski ek jhalak
Palko mein ek subah si
Taazgi ka anubhav
Ek ehsaas tumhaare hone ka
Ek pyar ka jo sabse alag
Tumhare andaaz mein jeena
Tumse jud jaana
Ye judna ye paana
Roshan hona, dekhna aur sharmana
Pighalna baar baar.
Ek puraane ped ki tarah
Mazboot jado pe khade rehna
Chhaya dena apni dhoop ki
Hamein dhoop se bachaana
Ye jalna – tumhara jaana
Iss aag ki lapto mein – sulagna
Fir bujhna
Ulajhna- sulajhna
Tummein kho jaana
Rum jaana
Raat mein diya
Diye ki roshni
Mein wo patanga
Jisske pankho ki sarsarahat mein
Tumhe poojna
Tumhe namaskar karna
Aur ek lambi saans le
Kan Kan mein samaana
Tumhaari sake mein simatna
Aankhein moonde
Doob jaana
Tumhaare aagosh mein.
All things interesting ... 